[أبو البراء]

اهلا وسهلا يم خالد

انا ماعرف للعلاج ولكن انا بدوي اسكن بمدينة جده وكبير بالسن ومبغي اعلمكم لكن يعني قولو متقاعد ونتم احسبوا

وهذي المرة اللي بعمان وتعالج جانا خبرها ونسمع عنها ولكن اكلمكم من خبرتنا كبدو ويمكن راينا ينفع والا العلم الزين بيكون من الطيبين بالمنتدى وكلامهم مقدم على رايي وانا ماعرف اكتب زيكم تزينون بلكلام ولكن الجود من الماجود

الجن بسم الله علينا وعليكم من شرهم يحضرون في البرور وعند المكاين اللي فيها ماء ويضاربون الناس ويصيحون في الخلق اللي يقربون ويرجمونهم بحجار واكثر شيء قريب المغرب وبعضنا يخاف منهم وبعضنا والله ميخافون ويناحرون فيهم وهم بعد يخافون منا وتسمعين ذراريهم يبكون اذا شافونا وحنا منشوفهم وهم يحبون الشعر والطبول ويحضرون مع الخلق والشعار والله اكثرهم مو بشاعر الا قرينته اللي تلقيه الشعر ويتراقصون وهذا صحيح وقد رايناه وحنا صغار واهلنا يعلمونا ويعرفون هذي القصص.

كان بعض الجن يعتدون علينا ويخنقون في اللي يصيدوه ويغيبوه يصير مايشعر باللي حوله وكان اللي مايرضابهم يصرعون فيه ويعذبونه ويخابطون فيه والله بعض الاحايين يموت الواحد من كثر مايرصون فيه.
وكان بعض الناس يرضابهم ويكرمونه الجن قبال رضاه فيهم ويعلمونه الدواء ويعلمونه يقص الماء تحت الارض ويعلمونه الشعر ويعلمون بالضايع وحنا نعرف هذولا ان الجن يتشرطون فيهم يعنى مايقدر الواحد يسوى شيء الا باوقات وبشروط والجن يكلمون بالاذن يوشون زي الدجاج والا يتكلمون من الصدر من فوق المعدة ويسمعه صاحبه واحايين يجون بالنوم سو كذا وكذا وربعنا يعرفون انهم جن ويستفيدون الناس منهم وهذي العمانية والله اعلم من الجن لانهم مشرطين عليها باوقات وماتاخذ دراهم.

وهذا الكلام اقوله لكم مو مزح والله وهذا كان يمر علينا والقصص في هذا كثير ولكن يوم كبرنا وتعلمنا على قدنا نقرا ونكتب ونسمع الشيوخ عرفنا ان كل سوالفنا هذي حرام ومايصلح نخاوي الجن الله يكافينا شرهم

وان شاء الله مايطلع اللي كتبته غلط وتطيحون فيه ....خذوني على قد فهمي واذا بي غلط فانى اتوب واستغفر الله منه وحبيت ربع هذا المنتدى الله يوفقهم ويشفي الشيخ ابو البراء

أبو ماهر