السلام عليكم ورحمة الله وبركاته
انا وحده قدّر الله علي واصبت بحسد وعين على كل شي ... لدرجة اني بعد القراءه ابقى طريحة الفراش لمدة 4 او 3 ايام من الالام ومافيني حيل
ولكن شفائي بيد اللي عينه ماتنام
ولكن الشئ الوحيد اللي مضايقني دراستي ياناس ... انا التحقت بجامعه حالي حال اي بنت
بديت فيها دراسه وبدأ معي كرهها مقدر اوصف لكم حالتي اذا جيت اداوم .. احيان امشي باسياب الجامعه هائمه بدون سبب وتضيع مني اغراضي بدون مانتبه يعني باختصار فيني بلاده وكأني مغيبه عن الوعي ... واذا رجعت البيت انام لليوم الثاني تخيلوا وخصوصا اذا عندي امتحان لدرجة قدمت اختبارات الترم الاول النصفيه والفاينال بدون مذاكره كنت دايم اتردد مكتب الاداره عشان اسحب ملفي ولكن اصبر نفسي واقول صيري قويه الى ان وصلت لمرحله مقدر اروح لها لدرجه يسحبوني لها وانا ارفض كررررررررره فضيع وضيقه واحيانا اتخيلها بيت مهجور امامي واتعوذ من ابليس وانزل لها غصبا عني ...
سحبت ملفي واكررهها الى الآن لدرجة اذا تكلموا عنها تجيني ضيقه واسبها بشكل لاشعوري
جلست سنه وقدمت ع جامعه ثانيه وكنت مستخيره ومرتاحه جدا خلصت ترم كامل بدرجات رائعه ومع كذلك فيني احساس داخلي يقول مارح تكملين ولارح تتخرجين وفعلا احس بيجيني شي يردني عن الدراسه
وللآن بديت الترم الثاني ياناس رجعت لي الضيقه .. لدرجة البس واتحضر واذا طلعت من باب البيت احس بكتمه قويه ومقدر اروح
هالشئ سبب لي اكتئاب خصوصا اني طول حياتي احلم بالدراسه وتكميلها .. اليوم عندي محاضره واحس مابي اروح من الصبح وانا فيني ضيقه
ياناس بغض النظر عن الضيقه فقدت قدرتي على المذاكره ... الاحظ نفسي اسهى كثير وما احفظ بسرعه مهما كررت
اقسم بالله تعبت نفسيا وهالامر مقلق لي .. لو احس اني يوم من الايام بترك الدراسه هذا يسبب لي اكتئاب نفسي 
خصوصا اني طموحه وتعذبت اخر سنه بالثانوي حتى اصل للنسبه المطلوبه ولكن ماتوفقت اموري بالجامعات
فيه احد زيي وتعالج ؟
مع اني محافظه ع الاذكار واحيان اقرى ايات الرقيه
بس هل هُناك ايات رقيه عن الحسد اللي ع جانب الدراسه ؟
لكم المايك ، نصيحه ، رقيه اي شي تفضلوا بها هنا