السلام عليكم ورحمة الله وبركاته
أنا مريضة بالصرع وكنت أتعالج لمدة طويلة في مستشفى الملك فهد
و دائماً أيام الاختبارات أتعب والترم الماضي تعبت تعب شديد ورحت لأحد الرقاة
وقال ان اللي فيني عين واستخدمت العسل والسدر والماء وزيت الزيتون وتمر العجوة
والسنا والكندس وحبة البركة
ومع ذلك أتعب وقال الشيخ لازم تسوي حجامة , سويتها والحمد لله تحسنت حالتي الصحية
وتحسن مستواي الدراسي وكنت في فترة الاختبارات لكن آخر يوم تعبت أكثر من أول
وكان الألم في اذني لدرجة اني كنت شبه فاقدة لحاسة السمع ومع الرقية استخدم الشيخ الخنق
والله كنت أصبر على الخنق وأتحمله عشان العلاج لكن الغريب في الموضوع اني صرت أحس
عيوني تنشد بشكل مو طبيعي وأحس اني أصيب أهلي لو ناظرت فيهم والله تعبت نفسياً
أنا ماكنت أصيب أحد ودائماً أقول ماشاء الله يبارك لها فيه اذا أعجبني شي لكن الحاصل
أني أصيب أي شي أعجبني والا ماأعجبني والله ياشيخ مو حسد ولا كره بالعكس أبكي وأتعذب
وصرت لدرجة أعطي أهلي من بعدي من خوفي عليهم أنا ماأبي أضر أحد والله أنا أتعذب أكثر منهم
بعدين قررت اني أعتزل أهلي وفعلاً جلست في غرفة لوحدي عشان ماأصيب أحد بس أشغل
قرآن وأرقي نفسي وبعد ماصرت أروح للشيخ لأني لو رحت له راح أصيبه ..
جلست على هالوضع اسبوعين في انقطاع تام بعدين قررت أرجع للشيخ عشان يخنقه وأرتاح
وفعلاً رجعت والحمد لله أحس عيني فكت شوي لكن الأحلام أتعبتني أقوم مفزوعه والله أكره النوم
ماأبي أنام عشان ماأحلم وصرت أكره أروح للشيخ أحس انهم كلهم ضدي ...
والحين تركت دراستي رغم انه آخر ترم وأتخرج لكن أحس اني أكرها وما أقدر أروح لها
:: سؤالي لكم ::
ليش عيوني تغيرت وهل اللي فيني يقدر يتحكم فيها ؟
وهل فعلاً يقدر يضر أهلي , هل هو يضرهم لأني أضغط عليه بالقرآن والرقية ؟
دائماً تجيني أفكار اذا قابلت أهلي أو رحت للشيخ راح يتعذبوا وأضرهم عشان كذا أبعد عنهم
أنا ما أبي أضر أحد والله أتعذب من هذا الشي وأحس اني أكره نفسي اذا ضريت أحد
::
ختاماً لكم الشكر والتقدير على الموقع الهادف
لاحرمكم الله الأجر والاخلاص في القول والعمل
اللهم رب الناس اذهب الباس واشفني واشفِ كل مريض أو مُبتلى
لا شفاء الا شفاؤك شفاءً لا يغادر سقماً ...
والحمد لله الذي لا يُحمد على مكروه سواه