السلام عليكم ورحمة الله وبركاته
حبيت اسأل الشيخ ابوالبراء جزاه الله خير
ياشيخ انا صارلي تقريبا ثلاث سنوات اعاني من اعراض غريبة مالقيت لها علاج
مشكلتي بدت ياشيخ قبل ثلاث سنوات لما زرت ناس من الاقارب بالرياض وكنت وقتها متزوج صارلي 3 شهور وكنت مدعو علي عشاء باستراحة وكان الحاضرين اكثرهم كبار سن المهم بعد ماسلمت عليهم وجلست حسيت بدوخة قوية مع غثيان حسيت اني بنصرع وبعدها راحت وبعد مارديت للبيت حسيت بحرارة بصدري علي رعشة بجسمي ومع غثيان قوي ودوخة وحسيت ان بطني بيخضني ومع ضيقة بالنفس وكتمة والاهم من هذا حسيت بخوف وفزع قوي ورحت علي طول الطبيب بمساعدة احد قرايبي ولما شفت الطبيب ارتحت حتي الطبيب قال انت مافيك شي بعد ماعمل لي فحوصات
المهم ياشيخ صار عندي خوف من تكرار الحاله هاذي خوف ياشيخ بشكل مو طبيعي خوف ياشيخ تغيرت حياتي بالكامل حتي هواياتي تغيرت
وبعد ها باسبوعين رجعت لبلدي الكويت وانا بالطريق كان تكييف السيارة بارد جدا والوقت كان الساعة 9 بالليل حسيت بألم بجنبي اليسار وحسيت ان قلبي يعورني وحسيت برعشة وفتور بجسمي وحسيت اني ضعيف وحسيت بخوف وجاني احساس بان موتي قرب ومع ضيقة واختناق وحسيت انني ببكي علي نفسي وقفت السيارة وقعدت اهدي نفسي واذكر الله واتشهد واحس بضربات قلبي سريعة وقوية تحاملت علي نفسي ووصلت لاقرب مركز صحي وقال لي انت مافيك شي حتي تخطيط القلب سواه وطلع سليم ولله الحمد
المهم ياشيخ لما وصلت الكويت عملت فحوصات كثيرة وماطلع معاي الا قرحة في الاثني عشر وارتخاء بالصمام المترالي بالقلب وقال الطبيب ان هذا الارتخاء عادي جدا وبالكاد يذكر وصرفني
بس الحين ياشيخ صرت موسوس فوق ماانا خايف من الحالة ترجعلي والله ياشيخ تركت كل هواياتي وصرت اشوف الدنيا صغيرة وانه ماتستاهل ان الواحد يسعي فيها حتي السفر ياشيخ صرت اخاف اسافر صارت عندي ضيقة وقلق وحشرة اذا حسيت اني بركب الطيارة او اذا قعدت بمكان فيه ناس واجد او صوت عالي احس اني انسان ضعيف حييل وان الناس كلها تقدر تسوي كل شي الا انا ماقدر كل ماحس بالم بجنبي اليسار او ذراعي اليسار اقول هذا اكيد من صمام القلب
احس ايام ان نفسيتي حلوة ومرتفعة واحس اني موسوس حيل وماعندي سالفة وايام اصير بنفسية تعبانه ومالي خلق حتي النوم مانام الا كم ساعة واقوم ولما اروح للفراش احس بخوف وفزع اخاف انام وبعدين اموت صرت اكره النوم والله ياشيخ احس بخنقة بصدري مع حرارة نفس خنقة العبرة بس معاها الم من شدتها واقعد اقوم وادور بالغرفة بروحي واحس ودي ابكي من الضيقة احس معاها بخوف ولما تجيني الحالة هاذي ماحب حتي احد يسألني شفيك اتضايق لما احد يحاول يخفف عني
انا ياشيخ تعبت تعبت حتي من زيارة الاطباء صرت احس اني ماراح اعيش بالدنيا لوقت طويل حتي لما اتحرك من غرفة لغرفة احس اني تعبت ودايما معاي دوخة وصداع وخفقان بالقلب كني راكض عشرة كيلو جري
ياشيخ ادري اني طولت وغثيتك بس والله ياشيخ انا قبل الاعراض هاذي تجيني كنت رجال راعي بر وطلعات بعيدة حتي لما تكون فيني حرارة او مرض كنت اسافر وانا بعز مرضي وماكنت احاتي شي وكنت دايما اضحك علي اي احد موسوس ويسولف عن العين واحس ان الامور هاذي كلها بعيدة عني